Un
ano parece a primeira vista moito tempo, pero cando un se da conta,
xa pasou, e outro novo agarda á volta da esquina. E as cousas que
levan un ano sucedéndose, cun xesto rutinario e armónico, acaban
por institucionalizarse de xeito natural, e a partir de ahí, o tempo
xa non conta, xa non hai volta atrás, xa é dificil desfacer o
embruxo. Un ano é moito tempo ata que, un ano de pronto xa pasou, e
foi un suspiro. E botas a vista atrás e parece que sempre foi así.
Que el sempre estivo ahí, tumbado na túa cama contándoche os seus
problemas con facenda, como se ademais da súa amante foses tamén a
súa conselleira.
***
Son
pouco máis das sete da mañá. El encende a tele e zappea como si
estivese na súa casa. Os bicos que se repiten teñen esa maxia, a de
convertir calquera espacio nunha patria conquistada. Ela ten presa.
Ten que ir ao traballo. El pode quedar a durmir un pouco máis. Pero
fai o esforzo de manterse desperto mentres ela se viste. Gústalle
vela bulir polo cuarto buscando os zapatos, botando perfume, secando
o pelo. As veces, cando vai con tempo, ela prepara unha taza de café
e vaina tomar ao cuarto, sentada á súa beira na cama. E ahí tocan
os últimos abrazos. Os últimos bicos. Cando ela regrese, despois do
traballo, encontrará o cuarto baleiro, coa fiestra aberta -para
ventilar- e a cama desfeita. Esa manía de nunca facer a cama cando
se marcha. Pero el ten detalles que a ela lle gustan moito. O oso de
peluche coa que ela adorna a cama non está tirado no chan, como
quedaba cando marchou. O oso sálvase do caos no que se convertiu a
habitación. Está sentado na cabeceira da cama, contemplando toda a
estancia, como esperando que ela chegue. E entre os seus braciños de
trapo suxeita un folio de papel con apenas dúas palabras escritas:
Mil bicos.
No hay comentarios:
Publicar un comentario